जळगाव मिरर | १५ जुलै २०२४
धावत्या रेल्वेतून पडल्याने ३० वर्षीय अनोळखी तरुणाचा मृत्यू झाला. ही घटना शनिवार दि. १३ जुलै रात्री जळगाव रेल्वे स्थानकावर घडली. या प्रकरणी रामानंद नगर पोलिस ठाण्यात अकस्मात मृत्यूची नोंद करण्यात आली आहे. मयताच्या खिशात सापडलेल्या चिठ्ठीवर एक क्रमांक आढळून आला असून त्यावरून तो राजस्थानचा असल्याचे समोर आले. ते जळगावत आल्यानंतरच त्या तरुणाची ओळख पटणार आहे.
मिळालेल्या माहितीनुसार, जळगाव रेल्वे स्थानकावरील फलाट क्रमांक तीनजवळ डाऊन रेल्वे मार्गावर खांबा क्रमांक ४१५/२७ जवळ एक तरुण पडलेला असल्याची माहिती मालगाडी चालकाने दिली. त्यानंतर लोहमार्ग पोलिस दलाचे पोहेकॉ सचिन भावसार व त्यांच्या सहकाऱ्यांनी घटनास्थळी जाऊन पाहणी केली व मृतदेह शासकीय वैद्यकीय महाविद्यालय व रुग्णालयात नेला. तेथे डॉक्टरांनी त्यास मयत घोषित केले. या तरुणाच्या खिशात एक चिठ्ठी सापडली. त्यावर असलेल्या मोबाईल क्रमांकांवर लोहमार्ग पोलिसांनी संपर्क साधला असता तो क्रमांक राजस्थान येथील निघाला. संबंधितांना तरुणाविषयी माहिती देण्यात आली असून ते आल्यानंतरच तरुणाची ओळख पटू शकणार असल्याचे पोलिसांनी सांगितले. या प्रकरणी रामानंद नगर पोलिस ठाण्यात अकस्मात मृत्यूची नोंद करण्यात आली आहे. पुढील तपास पोलिस नाईक अतुल चौधरी करीत आहेत.
