जळगाव मिरर | ५ जानेवारी २०२५
धरणगाव तालुक्यातील पाळधी येथे भरधाव धावणारी बस चालकाला दाट धुक्यामुळे पुढील अंदाज न आल्याने बसने कारला धडक दिल्यानंतर बस ही रस्त्याच्या खाली उतरल्याची घटना ४ रोजी पहाटे ६ वाजेच्या सुमारास घडली. दरम्यान, सुदैवाने या अपघातात कुणीही जखमी झाले नाही.
मिळालेल्या माहितीनुसार, अमळनेर येथील रहिवासी रणजित शिंदे हे त्यांच्या कुटुंब सह गोवा येथे जात होते. त्यासाठी ते आपल्या कार (एमएच १९, सीवाय ४८५२) ने जळगाव येत येथे होते. या वेळी कारमध्ये कुटुंबीयांसह त्यांचा जळगाव येथील भाचा वरद देवकर हा देखील सोबत होता. दरम्यान, ४ रोजी सकाळी ६ वाजेच्या सुमारास त्यांनी गाडी पेट्रोल भरण्यासाठी महामार्गावरील पारस पेट्रोल पंपावर वळवली. याच वेळी चोरगावहून जळगाव जाणारी बस (एमएच १४, बीटी २३६३) ने या कारच्या समोरील बोनटला जबर धडक दिली. ही धडक दिल्यानंतर बस रस्त्याच्या खाली उतरली.
यात बस रस्त्याच्या अर्धी खाली तर अर्धी वर अशा अवस्थेत लटकलेली होती. या अपघातात सुदैवाने कुणीही जखमी झाले नाही. मात्र कारच्या समोरील भागाचे नुकसान झाले आहे. दरम्यान, बस चालकाला दाट धुक्यामुळे ही कार न दिसल्याने हा अपघात झाल्याचे सूत्रांकडून सांगण्यात आले. या अपघातातमुळे महामार्गावरील वाहतूक विस्कळित झाली होती, ती पाळधी पोलिसांनी सुरळित केली. याबाबत वरद गिरीश देवकर (रा. जळगांव) यांनी दिलेल्या फिर्यादीवरुन गुन्हा दाखल करण्यात आला आहे. या घटनेचा तपास पाळधी पोलीस करत आहेत.
