जळगाव मिरर | २४ जुलै २०२४
मध्यरात्रीच्या सुमारास घरातून निघून गेलेल्या अनिल कमलाकर जाधव (वय ३५, रा. उमाळे, ता. जळगाव) या तरुणाचा मृतदेह गावाजवळ असलेल्या पाझर तलावाजवळ मंगळवारी सकाळच्या सुमारास मिळून आला. या घटनेमुळे गावात एकच खळबळ माजली होती. तरुणाच्या मृत्यूचे कारण अद्याप स्पष्ट नसून याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, जळगाव तालुक्यातील उमाळे येथे अनिल जाधव हा तरूण आपले आई-वडील यांच्यासह वास्तव्यास होता. शेतमजुरीचे काम करून तो आपल्या कुटुंबाचा उदरनिर्वाह करत होता. दरम्यान सोमवार दि. २२ जुलै रोजी रात्री तो घरातून बाहेर निघून गेला. दुसऱ्या दिवशी मंगळवारी सकाळी ७ वाजता उमाळे गावापासून जवळ असलेल्या एका पाझरतलावाजवळ त्याचा मृतदेह मयतस्थितीत आढळून आला. या घटनेची माहिती मिळाल्यानंतर गावातील तरुणांनी घटनांसाठी धाव घेतली. त्यानंतर त्याला जिल्हा शासकीय वैद्यकीय महाविद्यालयात दाखल केले असता वैद्यकीय अधिकारी यांनी मयत घोषित केले. दरम्यान याबाबत एमआयडीसी पोलिसात अकस्मात मृत्यूची नोंद घेण्याचे काम सुरू होते. मयत अनिल जाधव यांच्या पश्चात आई मंगलाबाई, वडील कमलाकर जाधव, दोन भाऊ निलेश आणि संजय आणि विवाहित बहीण असा परिवार आहे.
