जळगाव मिरर | १५ जुलै २०२४
शिरसोली रस्त्यावरील एका हॉटेलमध्ये जेवण करुन घरी परतणाऱ्या कार चालकाला कारवरील ताबा सुटले. त्यामुळे कार थेट रस्त्याच्या कडेला असलेल्या झाडावर धडकून झालेल्या अपघातात आनंद शांताराम सोनवणे (वय ३९, रा. कासमवाडी) हे जागीच ठार झाले. तर त्यांच्यासोबत असलेले तीन जण गंभीर जखमी झाले असून त्यांच्यावर खासगी रुग्णालयात उपचार सुरु आहेत. ही घटना रविवारी दुपारी सव्वाचार वाजेच्या सुमारास शिरसोलीकडून मोहाडीकडे जाणाऱ्या रस्त्यावर घडली. ही धडक इतकी जोरदार होती की, कारचा पुढील भागाचा चुराडा झाला आहे.
मिळालेल्या माहितीनुसार, शहरातील सामाजिक कार्यकर्ते असलेले आनंद सोनवणे हे त्यांचे मित्र भैरव उर्फ मुन्ना भगवान राणे (वय ३३), प्रवीण उर्फ पप्पू आढाव (वय ३५, सर्व रा. कासमवाडी), योगेश भालचंद्र रेंभोटकर (वय ५५) हे रविवारी दुपारच्या सुमारास (एचएच १९, सीझेड १२१२) क्रमांकाच्या कारने शिरसोली रस्त्यावरील एका हॉटेलमध्ये जेवणासाठी गेले होते. जेवण करून घरी परतत असताना दुपारी सव्वाचार वाजेच्या सुमारास कार चालकाचे कारवरील ताबा सुटला आणि कार थेट रस्त्याच्या कडेला असलेल्या झाडावर धडकली. या भीषण अपघातात आनंद सोनवणे हे जागीच ठार झाले. तर अन्य तिघे गंभीर जखमी झाले. अपघातानंतर रस्त्याने जाणाऱ्या-येणाऱ्या नागरिकांनी एमआयडीसी पोलिसांना घटनेची माहिती दिली. त्या वेळी कर्मचारी तसेच अपघातग्रस्तांचे मित्र, नातेवाईक घटनास्थळी पोहचले. चौघांना दुसऱ्या 1 वाहनामध्ये टाकून शासकीय वैद्यकीय महाविद्यालय व रुग्णालयात दाखल करण्यात आले. अपघातातील जखमींना जिल्हा रुग्णालयात आणल्यानंतर आनंद सोनवणे यांना वैद्यकीय अधिकाऱ्यांनी तपासणी करीत मयत घोषीत केले. तर गंभीर जखमी असलेल्या भैरव राणे, प्रवीण आढाव व योगेश रेंभोटकर यांना खासगी रुग्णालयात दाखल करण्यात आले. यामध्ये योगेश रेंभोटकर यांच्यावर अतिदक्षता विभागात उपचार सुरु असून त्यांची प्रकृती चिंताजनक आहे.
कारची झाडाला दिलेली धडक इतकी जोरात होती की, कारचा पुढील भागाचा पुर्णपणे चुराडा झालेला होता. तसेच कारमध्ये बसलेल्यांच्या चेहरा, डोके, कानाजवळ व तोंडावर जबर मार लागला आहे. या अपघातात एक जण जागीच ठार झाला होता तर अन्य तिघे बेशुद्ध झाले होते. अपघातात मयत झालेले आनंद सोनवणे हे सामाजिक कार्यात नेहमीच सक्रीय असत. कोणत्याही गरजुच्या मदतीसाठी ते नेहमी तत्पर असायचे, त्यांच्या मनमिळावू स्वभावामुळे शहरातील अनेक भागात त्यांचे परिचीत होते. दुर्देवी काळाने त्यांच्यावर झडप घातल्याने त्यांच्या पाच वर्षांची मुलगी व दोन वर्षांच्या मुलाच्या डोक्यावरील पितृछत्र हिरावून घेतले. त्यांच्या पश्चात आई-वडील, पत्नी, एक मुलगा, एक मुलगी, दोन भाऊ असा परिवार आहे.
