मुंबई : वृत्तसंस्था
आज मराठा क्रांती मोर्चाची बैठक मुख्यमंत्री एकनाथ शिंदे यांनी मुबंईत बोलावली होती. त्यानिमित्त मेटे हे बैठकीला जाण्यासाठी बीडहुन मेटे मुबईला निघाले होते बीडमध्ये आज मोठा कार्यक्रम असतानाही समाजाच्या प्रश्नाला न्याय मिळवून देण्यासाठी आपली उपस्थिती महत्त्वाची आहे, हे प्रमाण मानून त्यांनी बीडमधला कार्यक्रम सोडला आणि मुंबईच्या दिशेने रवाना झाले. पण वाटेत त्यांना काळाने गाठलं. मुंबई पुणे द्रुतगती महामार्गावर रायगडच्या हद्दीत त्यांचा अपघात झाला. अपघातानंतर सुमारे तासभर त्यांना मदतच मिळाली नाही, असा गंभीर आरोप त्यांच्या वाहनाच्या चालकाने केला आहे.
“पहाटे पाच वाजण्याच्या दरम्यान आमचा अपघात झाला. विनायक मेटे ज्या बाजूला बसले होते, त्या डाव्या बाजूला मोठ्या गाड्याची जोरदार धडक बसली. आमची गाडी त्या मोठ्या गाडीने काही अंतर ओढत नेली. त्यामुळे विनायक मेटे यांना जोरदार दणका बसला. अपघातानंतर आम्ही मदतीच्या प्रतिक्षेत होतो, पण आम्हाला तासभर वैद्यकीय मदत मिळाली नाही”, असा गंभीर आरोप मेटे यांचे चालक एकनाथ कदम यांनी केला आहे.
मुंबई-पुणे एक्स्प्रेस वेवर खालापूर टोलनाक्याजवळ विनायक मेटे यांच्या वाहनाला पहाटे साडेपाच वाजताच्या सुमारास अपघात झाला होता. या अपघातात मेटे यांच्या डोक्याला गंभीर दुखापत झाली होती. त्यानंतर त्यांना पनवेलमधील एमजीएम रुग्णालयात दाखल करण्यात आलं. मात्र तिथे उपचार सुरू असतानाच मेटे यांची मृत्यूशी झुंज अपयशी ठरली. माजी आ. विनायक मेटे यांचे जळगावशी खूप मोठे ऋणानुबंध आहेत. जळगावात ते भरपूर वेळा आपल्या संघटनेचा विस्तार करण्यासाठी नेहमी येत होते. त्यांच्या या जाण्याने जळगाव जिल्हातील शिवसंग्राम संघटनेत मोठी हानी झाली आहे.
