जळगाव मिरर | २९ डिसेंबर २०२३
राज्यातील पुणे शहरातील गुन्हेगारी सातत्याने वाढ होत असतांना नुकतेच एका दारूच्या दुकानात तीन जणांनी दरोडा टाकून कोयता, कुऱ्हाड दाखवत ग्राहकांकडून लूट केली आहे. दरोडेखोरांनी दुकानात घुसताच दुकानाचे शटर बंद केले. तसेच काही ग्राहकांना मारहाण देखील केली आहे. या घटनेचा व्हिडिओ सोशल मीडियावर व्हायरल होत आहे. रात्रीच्या सुमारास ही घटना घडली आहे.
मिळालेल्या माहितीनुसार, दारूच्या दुकानात नेहमीप्रमाणे ग्राहक दारू पित होते. अचानक तिघेजण आतमध्ये घुसले आणि त्यांनी दमदाटी करत कुऱ्हाडीचा धाक दाखवत ग्राहकांना मारहाण करण्यास सुरुवात केली. एकाने हॉटेलमधील ट्रे उचलत त्याने ग्राहकांना डोक्यात आणि लाथाबुक्यांनी मारहाण केली. ही सर्व घटना सीसीटीव्ही कॅमेऱ्यात कैद झाली आहे.
आधी कोयता गँग आणि आता कुऱ्हाड गँग सक्रीय झालीये का?, अशी भीती पुणेकरांच्या मनात निर्माण झाली आहे. ही घटना सीसीटीव्हीमध्ये कैद झाली. याप्रकरणी गुन्हा दाखल करण्यात आला आहे. तर पोलिसांकडून सध्या आरोपींचा शोध घेतला जात आहे. मात्र सतत घडणाऱ्या या गुन्हेगारीच्या घटनांमुळे पोलिस प्रशासनावरही अनेक प्रश्न उपस्थित होत आहेत. तसेच कायदा व सुव्यवस्था राखण्याचा प्रशासनावर दबाव आहे.