जळगाव मिरर | १४ मार्च २०२४
देशातील सर्वात मोठा पक्ष ठरलेल्या भाजपने लोकसभा निवडणुकीतील उमेदवारांची दुसरी यादी जाहीर केली आहे मात्र रावेर लोकसभा मतदार संघात रक्षा खडसे यांच्या उमेदवारीला भाजपच्या नेत्यासह कार्यकर्त्यांनी विरोध केल्याचे समोर आले आहे. रक्षा खडसे यांना तिकिट दिल्याने संतप्त झालेल्या शेकडो पदाधिकार्‍यांनी आपापल्या पदांचे राजीनामे दिल्याने जिल्ह्याच्या राजकारणात मोठी खळबळ उडाली आहे.
मिळालेल्या माहितीनुसार, भाजपने दि.१३ रोजी उमेदवारांची दुसरी यादी जाहीर केली. या यादीत रावेरमधून विद्यमान खासदार रक्षाताई खडसे यांना पुन्हा तिकिट जाहीर केले आहे. गेल्या अनेक महिन्यांपासून त्यांचे तिकिट कापले जाणार असल्याची चर्चा सुरू असतांनाच त्यांनाच पुन्हा तिकिट मिळाल्याने राजकीय वर्तुळात चर्चेला उधाण आले आहे. तर दुसरीकडे यामुळे तिकिटाचे प्रबळ दावेदार असणार्‍या विद्यमान जिल्हाध्यक्ष अमोल जावळे यांच्या समर्थकांमध्ये संतापाची प्रचंड लाट उसळली आहे. यातूनच यावल-रावेरमधील शेकडो पदाधिकार्‍यांनी आपापल्या पदांचे राजीनामे हे त्यांच्याकडे सुपुर्द केले आहेत. कोणत्याही स्थितीत आपण रक्षा खडसे यांचा प्रचार करणार नसल्याची भूमिका या पदाधिकार्‍यांनी घेतली आहे.
दरम्यान, राजीनामा देणार्‍या पदाधिकार्‍यांमध्ये पक्षाचे जिल्हा उपाध्यक्ष हिराभाऊ चौधरी, तालुकाध्यक्ष उमेश फेगडे, सहकार आघाडी जिल्हाध्यक्ष राकेश फेगडे, फैजपूरचे माजी नगराध्यक्ष पांडुरंग सराफ, ओबीसी मोर्चा राज्य उपाध्यक्ष हर्षल पाटील, नारायणबापू चौधरी यांच्यासह शेकडो पदाधिकार्‍यांचा समावेश आहे. रात्री उशीरापर्यंत भालोद येथे या पदाधिकार्‍यांनी आपण अमोल जावळे यांच्या सोबत असल्याचे सांगत संतप्त भावना व्यक्त केल्या.
