जळगाव मिरर | २२ जून २०२६
नाशिक स्थानिक स्वराज्य संस्था मतदारसंघाच्या विधान परिषद निवडणुकीत मोठा राजकीय उलटफेर घडला असून महायुतीचे अधिकृत उमेदवार नरेंद्र दराडे यांचा धक्कादायक पराभव झाला आहे. भाजपमधून बंडखोरी करून अपक्ष उमेदवारी कायम ठेवणारे गोकुळ गिते यांनी पहिल्याच फेरीत विजयाचा कोटा पार करत दणदणीत विजय मिळवला. या निकालामुळे महायुतीत खळबळ उडाली असून क्रॉस व्होटिंग, अंतर्गत नाराजी आणि विश्वासघाताच्या चर्चांना मोठे उधाण आले आहे.
या निवडणुकीत एकूण ६१८ मतदारांनी मतदानाचा हक्क बजावला. त्यापैकी १३ मते अवैध ठरल्याने ६०५ मते वैध मानण्यात आली. विजयासाठी ३०३ मतांचा कोटा आवश्यक होता. मतमोजणीदरम्यान गोकुळ गिते यांनी सुरुवातीपासूनच आघाडी घेतली आणि तब्बल ३५७ मते मिळवत विजयाचा टप्पा सहज पार केला. दुसरीकडे महायुतीचे अधिकृत उमेदवार नरेंद्र दराडे यांना केवळ २४८ मतांवर समाधान मानावे लागले. आणखी एक उमेदवार प्रसाद हिरे यांना एकही मत मिळाले नाही.
गोकुळ गिते हे सुरुवातीपासूनच या निवडणुकीतील चर्चेचे केंद्र होते. मंत्री गिरीश महाजन यांचे निकटवर्तीय मानले जाणारे गिते यांनी महायुतीच्या अधिकृत उमेदवाराविरोधात बंडखोरी करत निवडणुकीच्या रिंगणात उतरल्याने राजकीय वर्तुळात खळबळ उडाली होती. गिरीश महाजन, उदय सामंत आणि उपमुख्यमंत्री एकनाथ शिंदे यांनी त्यांची समजूत काढण्याचा प्रयत्न केल्याची चर्चा होती. अखेर त्यांनी सक्रिय प्रचार करणार नसल्याची घोषणा केली होती. मात्र, त्यांच्या समर्थकांकडून पडद्यामागे प्रचार सुरू असल्याच्या चर्चा निवडणुकीपूर्वीपासूनच रंगल्या होत्या. निकालानंतर त्या चर्चांना अधिक बळ मिळाले आहे.
मतमोजणी सुरू होण्यापूर्वीच गोकुळ गिते यांनी विजयाचा विश्वास व्यक्त केला होता. “मी स्वतः प्रचार केला नसला तरी माझ्या कार्यकर्त्यांनी मतदारांपर्यंत पोहोचण्याचे काम केले आहे. विजय माझाच होईल,” असा दावा त्यांनी केला होता. प्रत्यक्ष निकालात तो दावा खरा ठरला.
दरम्यान, मतमोजणी केंद्रातही मोठा गोंधळ निर्माण झाला होता. नरेंद्र दराडे यांचे बंधू आणि विद्यमान आमदार किशोर दराडे हे प्रतिनिधी म्हणून उपस्थित असल्याबाबत गोकुळ गिते यांनी हरकत घेतली. निवडणूक नियमांनुसार विद्यमान लोकप्रतिनिधींना प्रतिनिधी म्हणून बसण्याची परवानगी नसल्याचा दावा करत त्यांनी आक्षेप नोंदवला. यानंतर दोन्ही गटांच्या समर्थकांमध्ये शाब्दिक वाद रंगला आणि काही काळ मतमोजणी प्रक्रिया ठप्प झाली. निवडणूक अधिकाऱ्यांनी हस्तक्षेप करत पोलिस बंदोबस्तात परिस्थिती नियंत्रणात आणल्यानंतर मतमोजणी पुन्हा सुरू करण्यात आली.
पराभवानंतर नरेंद्र दराडे यांनी तीव्र नाराजी व्यक्त केली. महायुतीतील काही नेत्यांनीच आपला घात केल्याचा आरोप करत त्यांनी, “एकनाथ शिंदे यांना सोडले तर महायुतीतील इतर अनेकांनी माझा विश्वासघात केला,” अशी खंत व्यक्त केली. दुसरीकडे, खासदार संजय राऊत यांनी ठाकरे गटाच्या मतदारांनी शिंदे गटाच्या उमेदवाराविरोधात मतदान केल्याचा दावा केला. तर मंत्री गिरीश महाजन यांनी हा निकाल धक्कादायक असल्याचे मान्य करत पराभवाची कारणमीमांसा केली जाईल, असे स्पष्ट केले.
नाशिकमधील हा निकाल केवळ एका मतदारसंघापुरता मर्यादित नसून महायुतीतील अंतर्गत मतभेद, स्थानिक पातळीवरील नाराजी आणि संघटनात्मक आव्हाने अधोरेखित करणारा मानला जात आहे. त्यामुळे आगामी स्थानिक स्वराज्य संस्था निवडणुकांच्या पार्श्वभूमीवर या निकालाकडे राज्यभरातील राजकीय पक्षांचे लक्ष लागले आहे.
