जळगाव मिरर | ४ नोव्हेबर २०२३
देशभरातील प्रत्येक व्यक्ती दिवाळीची मोठ्या आतुरतेने वाट पाहत असतो. या उत्साहात देवी लक्ष्मी, भगवान विष्णू आणि बाप्पासह देवी रिद्धी-सिद्धीचा आशीर्वाद मिळवण्यासाठी पूजा करीत असतात तर धनत्रयोदशी आणि लक्ष्मीपूजनाच्या दिवशी नवीन खरेदी करणंदेखील शुभ मानलं जातं. धनत्रयोदशीला सोन्या, चांदीच्या दागिन्यांसह झाडू खरेदी करणं अत्यंत शुभ मानतात.
धनत्रयोदशीला लक्ष्मी देवीची कातरवेळी पूजा केली जाते. कातरवेळ म्हणजेच सूर्यास्त आणि चंद्रोदयाच्या मधली वेळ. यंदा 10 नोव्हेंबर रोजी धनत्रयोदशी आहे. शिवाय या दिवशी शुक्रवार असल्याने चांदी खरेदी करणं लाभदायी ठरेल.
ज्योतिषांनी सांगितलं की, शुक्रवारी खरेदी केलेल्या वस्तूंची वर्षभरात 13 पटीने वृद्धी होते. शिवाय या दिवशी चांदी खरेदी केल्यास लक्ष्मी देवी प्रसन्न होते. त्यामुळे धनत्रयोदशीला कोणतीही वस्तू खरेदी केलीत तरी त्यात कमीत कमी का होईना पण चांदी असेल याची काळजी घ्या. त्याचबरोबर यंदा धनत्रयोदशीला लक्ष्मी देवीसह महादेवांचीसुद्धा पूजा केली जाईल कारण याच दिवशी शिववास आणि प्रदोष व्रत आहे, अशी माहिती ज्योतिषांनी दिली. दरम्यान, धनत्रयोदशीच्या दिवशी लक्ष्मी पूजनासाठी संध्याकाळी 5 वाजून 29 मिनिटांपासून रात्री 8 वाजून 7 मिनिटांपर्यंत मुहूर्त आहे.