जळगाव मिरर | १४ ऑगस्ट २०२४
राज्यातील शिंदे सरकारने मागील महिन्यात राज्यातील महिलांसाठी ‘लाडकी बहिण योजना’ सुरु केली असून त्याचे पैसे येत्या दोन दिवसात राज्यातील महिलांच्या खात्यात येणार असून त्यापूर्वीचा विरोधक व सत्ताधारी यांच्यामध्ये आरोप प्रत्यारोप सुरु झाले आहे. नुकतेच राष्ट्रवादीच्या शरद पवार गटाच्या खासदार सुप्रिया सुळे यांनी आमदार रवी राणा यांना सज्जड दम भरला आहे. भर सभेत रवी राणा यांचा लाडक्या बहीण योजनेवरील विधानाचा व्हिडिओ दाखवत त्यांनी इशारा दिला आहे. तू पैसे परत तर घेऊन दाखव मग बघते काय कार्यक्रम करायचा ते, असे त्या म्हणाल्या आहेत.
दरम्यान, रवी राणा यांनी एका सभेत बोलताना महायुतीला मते द्या, नाही तर लाडकी बहीण योजनेचे पैसे काढून घेऊ असे वादग्रस्त विधान केले होते. यावरून सध्या राज्याचे राजकारण चांगलेच तापले आहे. विरोधकांकडून सातत्त्याने या विधानावरून सत्ताधाऱ्यांना लक्ष केले जात आहे.
शरदचंद्र पवार पक्षाची शिवस्वराज्य यात्रा आज सोलापुरातील माढ्यात पार पडली आहे. माढा तालुक्यातील टेंभुर्णी गावात शिवस्वराज्य यात्रेची सभा झाली. या सभेत खासदार सुप्रिया सुळे, अमोल कोल्हे, धैर्यशील मोहिते पाटील यांनी संबोधित केले. यावेळी सुप्रिया सुळे यांनी धडाकेबाज भाषण केले आहे. ”मी जय श्रीराम म्हणत नाही, मी मर्यादापुरुषोत्तम प्रभू श्रीराम म्हणते”, असे सुप्रिया सुळे यावेळी म्हणाल्या.
त्यांनी यावेळी रवी राणा यांच्या विधानाचा व्हिडिओ भर सभेत ऐकवला आहे. त्या म्हणाल्या, ”बहिणीला सासरी सोडणारा भाऊ असतो. पण हा भाऊ दिलेली ओवाळणी परत घेतो, असा दम देत आहे. माझ्या राज्यातील बहिणीला असा दम कोणी दिला तर बहीण म्हणेल, नको बाबा तुझे 1500 रुपये ठेव तुलाच. मात्र राज्यातील बहिणींचा अशी धमकी कोणी देत असेल तर, तू पैसे परत घेऊन तर दाखव, बघते कसा कार्यक्रम करायचा ते”, अशा शब्दांत सुप्रिया सुळे यांनी निशाणा साधला आहे.
