जळगाव मिरर | १४ जून २०२४
चाळीसगाव येथील एका महिलेला खोट्या गुन्ह्यात अडकल्याचे सांगत व या प्रकरणी तीन वर्षांची शिक्षा होणार असल्याची धमकी देत, नकली सीबीआयच्या अधिकाऱ्यांनी महिलेला आठ लाख ५० हजार रुपयांचा चुना लावल्याची घटना उघडकीस आली आहे. या प्रकरणी जळगाव सायबर पोलिस स्टेशनमध्ये दोघाजणांविरुद्ध गुन्हा दाखल करण्यात आला आहे.
मिळालेल्या माहितीनुसार, चाळीसगाव शहरातील विवेकानंद कॉलनी भागात वास्तव्यास असलेली एक ४२ वर्षीय महिला खासगी ठिकाणी नोकरी करते. त्यांना ११ जून रोजी व्हॉटस्अॅपवरून फोन आला. त्यांतील एका व्यक्तीने त्याचे नाव अनिल यादव सांगत, तो सीबीआयचा अधिकारी असल्याचे सांगितले. तसेच संबंधित महिला एका गुन्ह्यात अडकली असल्याचे त्याने सांगितले. सुरुवातीला महिलेने या कॉलकडे दुर्लक्ष केले. मात्र, त्यानंतर पुन्हा सुनील कुमार नामक व्यक्तीचा फोन आला; तसेच संबंधित व्यक्तीनेदेखील आपण सीबीआयचे अधिकारी असल्याचे सांगितले. त्यानंतर महिला घाबरली. तसेच ज्या गुन्ह्यात ती महिला अडकली असल्याचे तोतया अधिकाऱ्यांनी सांगितले. शिक्षेपासून वाचायचे असल्यास ऑनलाइन पद्धतीने ८ लाख ५० हजार रुपयांची रक्कम देण्याची मागणी केली. यानंतर घाबरलेल्या महिलेने आठ लाख ५० हजार रुपयांची रक्कम त्यांच्या खात्यात वर्ग केली. त्यानंतर या दोघांनीही फोन बंद करून टाकले.
