जळगाव मिरर | १७ एप्रिल २०२४
गेल्या काही दिवसपासून जळगाव जिल्ह्यातील राष्ट्रवादीचे नेते एकनाथ खडसे हे पुन्हा भाजपात दाखल होण्याची जोरदार चर्चा सुरु असतांना आता मात्र वेगळ्या कारणाने आ.खडसे चर्चेत आले आहे. ज्येष्ठ नेते एकनाथ खडसे यांना चार वेगवेगळ्या मोबाईल नंबर वरून धमकीचे फोन आल्याची धक्कादायक माहिती समोर आली आहे. याप्रकरणी एकनाथ खडसे यांच्यावतीने मुक्ताईनगर पोलीस ठाण्यामध्ये तक्रार दाखल करण्यात आली आहे. या प्रकरणाचा तपास स्थानिक पोलिस करत असून त्यांचा अहवाल आल्यानंतर या धमकीचे गांभीर्य पाहून या प्रकरणात गृहमंत्री देवेंद्र फडणवीस यांनी लक्ष घालावे, अशी मागणी एकनाथ खडसे यांनी केली आहे.
एकिकडे लोकसभा निवडणुकीची रणधुमाळी सुरू आहे. लोकसभा निवडणुकीच्या प्रचारात सर्वच राजकीय पक्षाचे नेते मंडळी व्यस्त आहेत. त्यातच रावेर लोकसभा मतदारसंघातील भारतीय जनता पक्षाच्या उमेदवार रक्षा खडसे यांचे सासरे आणि ज्येष्ठ नेते एकनाथ खडसे यांना धमकीचे फोन आले आहेत. त्यांना दाऊद आणि छोटा शकील गँगकडून हे धमकीचे फोन आल्याची माहिती समोर आली आहे. चार वेगवेगळ्या फोनवरून ही धमकी देण्यात आली आहे. याप्रकरणी एकनाथ खडसे यांच्या वतीने मुक्ताईनगर पोलिस ठाण्यात तक्रार देखील दाखल करण्यात आली आहे. मात्र राज्यात लोकसभा निवडणुकीची रणधुमाळी सुरू असताना अशा प्रकारचे धमकीचे फोन आल्यामुळे या प्रकरणाचे गांभीर्य आणखीनच वाढले आहे.