जळगाव मिरर | १२ जून २०२४
राज्यातील अनेक ठिकाणी अल्पवयीन मुलीसह विवाहितेवर अत्याचाराच्या घटना दिवसेदिवस वाढत असतांना जळगाव जिल्हा देखील अशाच एका धक्कादायक घटनेने हादरून गेला आहे. जिल्ह्यातील जामनेर तालुक्यातील एका गावठाण हद्दीत राहणार्या अवघ्या सहा वर्षीय मुलीची गळा आवळून हत्या करण्यात आल्याची घटना मंगळवारी रात्री 11 वाजेच्या सुमारास उघडकीस आल्यानंतर जिल्ह्यात खळबळ उडाली आहे.
सविस्तर वृत्त असे कि, तालुक्यातील केकतनिंभोरा शिवारातील चिंचखेडा गावठाण बुद्रुक येथे हा प्रकार घडला असून पोलिसांनी संशयीताची ओळख पटवली आहे. दरम्यान, अल्पवयीनावर अत्याचार झाल्याचा संशय असून वैद्यकीय तपासणीत ही बाब स्पष्ट होईल, असे पोलीस सूत्रांनी सांगितले. जामनेर तालुक्यातील एका गावठाण हद्दीत काही आदिवासी कुटुंब वास्तव्यास असून पेरणीच्या दिवसांमुळे कुटूंब शेतात गेल्यानंतर या कुटूंबातील अवघ्या सहा वर्षाची बालिका घरी असल्याने २५ वर्षीय नराधमाने अल्पवयीन मुलीला एका केळीच्या मळ्यात नेत तिच्यावर अत्याचार केला व नंतर तिचा गळा आवळून खून केला. पीडित अल्पवयीन मुलीचे आईवडील सायंकाळी कामावरुन घरी आल्यावर त्यांनी मुलीला घरात पाहिले घरात मुलगी दिसली नाही म्हणून त्यांनी आसपासच्या शेजार्यांना विचारपूस केली मात्र मुलगी सापडली नाही तेव्हा त्यांनी गावकर्यांना ही घटना सांगितली. गावकर्यांनी मुलीचा सर्वदूर शोध घेतला असता ती मुलगी एका केळीच्या मळ्यात मृतावस्थेत आढळली.
गावकर्यांनी तातडीने जामनेर पोलीस स्टेशनला घटनेविषयी सविस्तर माहिती दिली. घटनेची माहिती मिळताच जामनेर पोलीस स्टेशनचे पोलीस निरीक्षक किरण शिंदे यांनी त्याच्या सहकार्यांसह घटनास्थळी धाव घेतली. मृत मुलीचा मृतदेह उत्तरीय तपासणीसाठी जळगाव जिल्हा सामान्य रुग्णालय आणि वैद्यकीय महाविद्यालयात हलवण्यात आला आहे. दरम्यान, दोषी तरुणाला अटक होत नाही तो पर्यंत मृतदेह ताब्यात घेणार नाही, असा पवित्रा पीडीतेच्या कुटूंबातील नातेवाईकांनी घेतला आहे. मयताच्या पश्चात भाऊ, दोन बहिणी व आई-वडील असा परिवार आहे.